கோவையில் ஏன் திமுக கூட்டணி அடிவாங்கியது?

கோவை:

மொத்தத்தொகுதிகள் : 15
அதி.மு.க.+ : 10
தி.மு.க.+:5

கோவை நாடாளுமன்றத்துக்குட்பட்டவை: (இப்போது வென்றவர்கள்)
கோவை மேற்கு (அ.தி.மு.க.)
கோவை கிழக்கு (அ.தி.மு.க.)
சிங்காநல்லூர் (அ.தி.மு.க. - ஐ.என்.டி.யு.சி.)
பேரூர் (அ.தி.மு.க.)
பல்லடம் (அ.தி.மு.க.)
திருப்பூர் (கம்யூ.மா.)

கோவையில் பெரும்பாலும் கோவையைச் சுற்றியுள்ள 6 தொகுதிகளிலும் திமுகவுக்கு ஆதரவு முன்பு இருந்தது. 1984 தேர்தலில் இந்திராவின் சாவையும் எம்ஜியாரின் நோவையும் வைத்து அடித்த அலையிலே கோவை நாடாளுமன்றத்துக்கு 1 லட்சத்துக்கும் மேல் வித்தியாசத்தில் காங்கிரசை வெற்றி பெறச் செய்தவர்கள், அந்த நாடாளூமன்றத்தொகுதிக்குட்ப 6-ல் 5-ல் திமுக அணியை வெற்றிபெறச் செய்தார்கள். ஆனால் அப்போதெல்லாம், திமுக ஆட்சியில் கட்டிய மேம்பாலம், குடிசைமாற்று வாரியத்தில் கட்டித்தரப்பட்ட வீடுகள் போன்ற வரலாறு இவர்கள் மேல் நம்பிக்கையை அளித்திருந்ததும், நிறுவனப்பட்டுப்போயிருந்த தொழிற்சாலைகள், அவற்றின் தொழிற்சங்கங்கள் அவற்றின் தாக்கமும் (அப்போது தி.மு.க. வுடன் கம்யூனிஸ்டுகள் மட்டும்) காரணம். இன்று தொழிற்சூழல் மாறிவிட்ட நிலையில் கம்யூனிஸ்ட்டுகள் நீர்த்துப்போயினர். முந்தைய தி.மு.க. ஆட்சியில் சொல்லிக்கொள்ளும்படியாக கோவைப்பகுதியில் பெரிய திட்டங்கள் செய்திருக்கவில்லை. ஒரு 100 அடி நீளப்பாலத்துக்குப்போய் போகவர 12 ரூபாய் தண்டம் கட்டும் வகையில் ஏற்கனவே இருந்த நொய்யல் பாலத்தை விரிவாக்கியதோடு சரி! எனவே நகர்ப்புறத்தில் திமுகவின் செல்வாக்கு சரிந்திருக்குமோ?

சொல்லமுடியவில்லை. நான் அறிந்த வரையில் கடந்த 15 ஆண்டுகால சிறுதொழில்/சிறுவணிக வளர்ச்சி வரலாற்றை எடுத்துக்கொண்டால் இரண்டு அதி.மு.க. ஆட்சிக்காலத்திலும் நன்றாக இருந்த 'பணப்புழக்கம்' இடையில் இருந்த தி.மு.க. ஆட்சியில் சரிந்தது மக்கள் மனதில் இன்னும் ஆழமாக இருக்கிறது. மத்திய மாநில அரசுகளின் பெரிய முதலீடு எதுவுமில்லாததாலும், டாடா, பிர்லா, அம்பானி, ப்ரெம்ஜிக்களின் ஆதரவும் இல்லாமலும், சிறுதொழிலையும், வணிகத்தையும் மட்டுமே நம்பியிருக்கும் கோவைப் பொருளாதாரம் இன்னொரு அடியை வாங்கத் தயாராக இல்லை. தொடர் குண்டுவெடிப்புகளுக்குப்பின் வீழ்ந்துவிட்ட கேரளாவிலிருந்தான சவுளி/நகை/ஹார்ட்வேர் வியாபாரம், ரியல் எஸ்டேட் சந்தை இப்போதுதான் எழுந்து நிற்கின்றன. கோட்டைமேடு வழியாகப் போவதே சிரமமாயிருந்த காலம் போய் இன்று சட்டம் ஒழுங்கு நிலைமை சீராக இருப்பதும் இந்த 5 ஆண்டுகளாய்த்தான். இதுவெல்லாம் மக்கள் மனதில் அழுத்தமாகப் பதிந்துள்ள விஷயங்களாக இருக்கின்றன. இவையெல்லாம் சேர்ந்தே இந்த மாநிலம் தழுவிய அளவில் தி.மு.க. அணி நன்கு வெற்றிபெற்றும் இங்கே அடி வாங்கியதுக்கு நான் விசாரித்த அளவில் காரணங்கள். இதில் எது சரி எது தவறு என்றெல்லாம் தெரியவில்லை.

தேர்தல் ஆணையத்துக்கும் விஜயகாந்துக்கும் என்ன பிணக்கு?

மே 8ஆம் தேதியன்று தமிழ்மணம் தேர்தல்-2006 சிறப்புப்பக்கம் தயாரிக்க தேர்தல் ஆணையத்தின் இணையத்தளத்திலிருந்து தமிழகத்தின் மொத்த வேட்பாளர் பட்டியலை எடுத்தோம். அதில் ஆங்கிலத்தில் உள்ள பட்டியலுக்கும் தமிழில் உள்ள பட்டியலுக்கும் சரியாக 232 குறைவாக இருந்தது. எதேச்சையாக விருத்தாசலம் தொகுதியைப் பார்த்த போதுதான் விஜயகாந்த் என்ற பெயரில் உள்ள 26, 30 வயது ஆட்கள் மட்டும் இருப்பது தெரிந்தது. 55 வயது விஜயகாந்தைக் காணோம்! கேப்டன் கட்சியின் 232 வேட்பாளர்களும் தமிழ்பட்டியலில் விடுபட்டிருப்பது தெரிந்தது. இன்று தி ஹிந்துவில் ஒரு செய்தி: கேரளாவில் ஒரு வேட்பாளர் பெயரும் கணக்கில் வராமல் போனது என்பது. இங்கே 232, அதுவும் ஒரு வளரும் கட்சி!
தொடர்புள்ள சுட்டி: http://genesys.eci.gov.in/fullcandidatelist/uireports.aspx
இப்போது சரி செய்துவிட்டார்கள். ஆனாலும் முன்பு தமிழில் எக்செல்லில் தெரிந்த கட்டங்கள் இப்போது குழம்பிப்போய்த்தெரிகின்றன!

http://eci.gov.in/TAMILMay2006/pollupd/ac/states/s22/a_index.htm என்ற முடிவுகள் அறிவிக்கும் தளத்தில்கூட விஜயகாந்த்தின் பெயர் கட்சியில்லாமல் காட்டப்படுவதைக்காணலாம்.

இந்த ஒரு குறையைத்தவிர மற்றபடி அருமையாகத் தொகுக்கப்பட்ட தரவுகள். யுனிகோடு தமிழில் இருப்பதால் 'அப்படியே சாப்பிடலாம்!' தேர்தல் ஆணையத்துக்குப் பாராட்டும் நன்றியும்.

வாக்களிக்கப்போனேன்

எங்கள் சிங்காநல்லூர் தொகுதியில் பெரிய கட்சியில் இரண்டுபேரும் தொழிற்சங்கவாதிகள். அதுவா இதுவா என்று இருந்த நான் கடைசியில் வழக்கமாகப் போடும் கட்சிக்கே போட்டுவிட்டேன். ஆனால் என் மனைவி விடாப்பிடியாக ஓ தான் போடுவேன் என்று அடம் பிடிக்க, 'அதெல்லாம் விரலில் மைவைக்கும் முன்பே சொல்லணும் இப்ப முடியாது, மேலும் அதுக்கான பாரம் எல்லாம் இங்கே இல்லை' அழிச்சாட்டியம் பண்ணி அவரையும் போடவைத்துவிட்டார்கள் அலுவலர்கள்.

பொதுவாக அமைதியாக கண்ணியமாக நடந்தது வாக்குப்பதிவு.

என் கணிப்பு:

திமுக அணி: 140-150 தொகுதிகள்
அதிமுக அணி: 70-80 தொகுதிகள்
மற்றவர்: 5-20 தொகுதிகள்

முக்கியமாக: இரண்டு பெரிய கட்சிகளும் அடித்த லூட்டிதாங்காமல் 'முரச'றைந்தவர்கள் 10-15% இருப்பார்கள் என்பேன்.

தேர் நிலைக்கு வந்துவிட்டது.

ரீடிஃப் கொடுத்த சேவையில் தொடங்கி, பிறகு ப்ளாக்கர் சேவைக்கு மாறி, தனிவீடு கட்டிக்கொள்வதில் ஈடுபாடு வந்து நியூக்ளியஸ் சிஎம்எஸ் நிரலியால் சொந்தத்தளத்தில் வலைப்பதித்துக்கொண்டிருந்தவன் கொஞ்ச நாள் சும்மா இருந்துவிட்டு, வேர்ட்பிரசுக்கு மாறலாமா, புதிய ப்ளாக்சிஎம்எஸ் நிறுவலாமா என்ற யோசனைகளை உடைப்பில் போட்டுவிட்டு இதோ ப்ளாக்கர் சேவைக்கே மறுபடியும் வந்துவிட்டேன். இதுவே இனி நிரந்தரமாக இருக்க எல்லாம் வல்லோன் ஆசியளிக்கட்டும்.